അബൂദബി: മുഹമ്മദ് ബിൻ സായിദ് സിറ്റിയിലെ ഇത്തിഹാദ് റെയിൽ പാസഞ്ചർ സ്റ്റേഷനിലേക്കുള്ള യാത്ര എളുപ്പമാക്കാൻ അബൂദബി മൊബിലിറ്റി രണ്ട് നേരിട്ടുള്ള ബസ് റൂട്ടുകൾ ആരംഭിച്ചു. അൽ വഹ്ദ മെയിൻ ബസ് സ്റ്റേഷനിൽനിന്നുള്ള എം.ആർ 1, അൽ സാഹിയ ബസ് സ്റ്റേഷനിൽനിന്നുള്ള എം.ആർ 2 സർവീസുകളാണ് റെയിൽ സ്റ്റേഷനുമായി ബന്ധിപ്പിക്കുന്നത്. എം.ആർ 1 യാത്രയ്ക്ക് ഏകദേശം 50 മിനിറ്റും എം.ആർ 2യ്ക്ക് 47 മിനിറ്റുമെടുക്കും. ഇരു റൂട്ടുകളിലും ആഴ്ചയിലെ ഏഴ് ദിവസവും രണ്ടുദിശകളിലേക്കും സർവീസ് ലഭ്യമാണ്. വിശദമായ സമയക്രമം അബൂദബി മൊബിലിറ്റി വെബ്‌സൈറ്റിലും ദർബ് ആപ്പിലും പരിശോധിക്കാം.