ജിദ്ദ: ‘ദി കംബാക്ക്’ അന്താരാഷ്ട്ര ബോക്സിങ് നൈറ്റിൽ സൗദി താരം സുൽത്താൻ അൽ മുഹമ്മദ് സ്പെയിനിന്റെ ഇഫ്രെൻ ബെസാൽഡൂച്ചിനെ കീഴടക്കി. ഫെദർവെയ്റ്റ് വിഭാഗത്തിൽ നാല് റൗണ്ട് നീണ്ട മത്സരത്തിലൂടെയാണ് ആതിഥേയ താരത്തിന്റെ വിജയം. ലോകതാരങ്ങളും സൗദി ചാമ്പ്യന്മാരും പങ്കെടുക്കുന്ന ടൂർണമെന്റിൽ സൗദിക്ക് മികച്ച തുടക്കമാണ് ഈ ജയം നൽകിയത്. പ്രധാന നൈറ്റിൽ മുൻ ലോക ചാമ്പ്യനായ ബ്രിട്ടീഷ് താരം ആൻറണി ജോഷ്വ അൽബേനിയയുടെ ക്രിസ്റ്റ്യൻ പ്രെങ്ഗയെ നേരിടും. മുഖ്യപോരാട്ടം കാണാൻ ജിദ്ദയിൽ വലിയ കായികപ്രേമി സാന്നിധ്യം പ്രതീക്ഷിക്കുന്നതായി സംഘാടകർ അറിയിച്ചു.