നീറ്റ് ചോദ്യപേപ്പർ ചോർച്ചക്കെതിരെ ഡൽഹിയിൽ പ്രതിഷേധിച്ച വിദ്യാർഥികൾക്കുനേരെ പെല്ലറ്റ് തോക്കും കണ്ണീർവാതകവും ഉപയോഗിച്ച പൊലീസ് നടപടിയിൽ കേന്ദ്ര ആഭ്യന്തരമന്ത്രി അമിത് ഷാ മറുപടി പറയണമെന്ന് ലോക്സഭ പ്രതിപക്ഷ നേതാവ് രാഹുൽ ഗാന്ധി ആവശ്യപ്പെട്ടു. ജൂലൈ 20ലെ സംഭവവുമായി ബന്ധപ്പെട്ട് രണ്ടു പേജുള്ള കത്ത് സമൂഹമാധ്യമങ്ങളിലൂടെ പുറത്തുവിട്ട അദ്ദേഹം, ബലപ്രയോഗത്തിന് ആരാണ് ഉത്തരവിട്ടതെന്നും അനുമതി നൽകിയതെന്നും വ്യക്തമാക്കണമെന്ന് ആവശ്യപ്പെട്ടു. സമാധാനപരമായി പ്രതിഷേധിച്ച വിദ്യാർഥികൾക്ക് ഗുരുതരമായി പരിക്കേറ്റെന്നും ഉത്തരവാദിത്തമുള്ള വിദ്യാഭ്യാസ സംവിധാനമാണ് അവർ ആവശ്യപ്പെട്ടതെന്നും രാഹുൽ കത്തിൽ ആരോപിച്ചു.