കുവൈറ്റ് സിറ്റി: അപൂർവവും സംരക്ഷണം ആവശ്യമായതുമായ യൂറേഷ്യൻ ട്രീ ഔൾ വിഭാഗത്തിലെ മൂങ്ങകളെ കുവൈറ്റിൽ കണ്ടെത്തിയതായി പരിസ്ഥിതി പൊതു അതോറിറ്റി അറിയിച്ചു. ദേശാടനത്തിനിടെ വിശ്രമിക്കാനെത്തുന്ന പക്ഷികളെ പിടികൂടുകയോ ഉപദ്രവിക്കുകയോ ചെയ്യരുതെന്ന് പൊതുജനങ്ങൾക്ക് മുന്നറിയിപ്പ് നൽകി. സെപ്റ്റംബർ–ഒക്ടോബർ, മാർച്ച്–ഏപ്രിൽ കാലങ്ങളിൽ ഇവ കുവൈറ്റിലെത്താറുണ്ട്; പാർക്കുകളിലും താമസമേഖലകളിലെ മരങ്ങളിലും കാണാം. പരിക്കേറ്റ പക്ഷിയെ കണ്ടെത്തിയാൽ 157 ഹോട്ട്‌ലൈനിലോ അതോറിറ്റിയുടെ സാമൂഹ്യമാധ്യമ അക്കൗണ്ടുകളിലൂടെയോ അറിയിക്കണം. മരത്തോലിനോട് ചേർന്ന നിറവും ശരീരം മരച്ചില്ലപോലെ നിവർത്തുന്ന പ്രതിരോധരീതിയുമാണ് ഇവയുടെ പ്രത്യേകത.