ജന്തർ മന്തറിലെ വിദ്യാർഥി സമരവേദിയിലേക്ക് ആവശ്യത്തിന് ഭക്ഷണവും കുടിവെള്ളവും ലഭിച്ചിട്ടുണ്ടെന്നും താൽക്കാലികമായി കൂടുതൽ ഓൺലൈൻ ഓർഡറുകൾ അയക്കരുതെന്നും സമരസംഘടന പൊതുജനങ്ങളോട് അഭ്യർഥിച്ചു. രാജ്യത്തിന്റെ വിവിധ ഭാഗങ്ങളിൽനിന്ന് ലഭിച്ച പിന്തുണയെത്തുടർന്ന് വൻതോതിൽ ഭക്ഷണപ്പൊതികൾ എത്തിയിരുന്നു. ആവശ്യത്തിലധികം എത്തുന്ന ഭക്ഷണം പാഴാകാതിരിക്കാനാണ് പുതിയ നിർദേശം. സമരക്കാർക്ക് പിന്തുണ നൽകിയ വ്യക്തികൾക്കും സംഘടനകൾക്കും നന്ദി അറിയിച്ച സംഘം ആവശ്യമായാൽ വീണ്ടും സഹായം അഭ്യർഥിക്കുമെന്നും വ്യക്തമാക്കി.