കുവൈറ്റ് സിറ്റി: പശ്ചിമേഷ്യയിലെ സുരക്ഷാ സാഹചര്യം അസ്ഥിരമായി തുടരുന്നതിനാൽ കുവൈറ്റിലുള്ള അമേരിക്കൻ പൗരന്മാർ കൂടുതൽ ജാഗ്രത പാലിക്കണമെന്ന് യുഎസ് എംബസി നിർദേശിച്ചു. അപ്രതീക്ഷിത സൈനിക നീക്കങ്ങൾ, സുരക്ഷാ ഭീഷണികൾ, വിമാന സർവീസുകളുടെ റദ്ദാക്കൽ അല്ലെങ്കിൽ വൈകൽ, വ്യോമപാത അടച്ചിടൽ എന്നിവയ്ക്ക് സാധ്യതയുണ്ടെന്ന് മുന്നറിയിപ്പിൽ പറയുന്നു. യാത്രക്കാർ വിമാനക്കമ്പനികളുടെയും കുവൈറ്റ് അന്താരാഷ്ട്ര വിമാനത്താവളത്തിന്റെയും ഔദ്യോഗിക അറിയിപ്പുകൾ പരിശോധിക്കണം. പശ്ചിമേഷ്യയിലേക്കോ മേഖല വഴിയുള്ള ട്രാൻസിറ്റ് യാത്രകളോ ഒഴിവാക്കാനും അമേരിക്കൻ സ്ഥാപനങ്ങൾക്കും വാണിജ്യകേന്ദ്രങ്ങൾക്കും സമീപം പ്രത്യേകം ജാഗ്രത പാലിക്കാനും നിർദേശിച്ചു.